Hier twee woorden: Achterwaringe. In De Bo staat er achterwarege en achterwarigge[1] maar het woord achterwaringe en staat er niet in den zin in denwelken dat ’t te Kortryk gebezigd wordt. Achterwaringe te Kortryk beteekent minne, garde-couche. ’K zegge te Kortryk want ’t is daar dat ik dat woord dikwyls in dien zin meest gehoord heb. Maar heeft myn moeder dit woord medegebracht van Gheluwe en Meenen, of is ’t Kortryksch, dat en kan ik niet verzekeren. Genoeg is ’t en zoo vele dat zy dat altyd in dien zin gebruikt.
Bestaansel[2] uitgesproken bestansel. De Bo geeft het woord, maar men zou zeggen dat het oud is of beter verouderd. Dit woord wordt helder op gebezigd te Oostcamp.
Broomol[3] is peize ik hetzelfste als Broowulf; een die veel Brood eet, zoodanig dat de weelde er van verloren gaat.
De grate[4] is peize ik voorzekers de ruggrate. Te Kortryk immers zegt men geheel dikwyls: ’k ga uj ruggrate instampen. – In verdreeg staan[5] = être sous le coup d’une ménace.
